「千祈千祈千祈，洗手洗手洗手」，呢句沙士時嘅經典對白，今時今日依然適用。日前有班家長喺工廈為小朋友開生日派對，結果樂極生悲，三十一個人裏面有廿三人感染流感，都咪話唔得人驚。所以話，任何時候都要注意衞生，千祈唔好學港府咁，將清潔運動當做騷，求求其其，是是但但，想唔出事都幾難。
唔係亂噏o架，港府早排係威係勢發起為期兩個月嘅「全城清潔運動」，高官空群而出，又掃街又抹窗，大鑼大鼓做咗場大龍鳳，清潔運動九月底結束時，當局聲稱喺各部門合作之下，衞生情況大有改善喎。事實係咪咁呢？本報記者落區視察，發現問題多多，垃圾堆積如山有之，老鼠曱甴橫行有之，有啲衞生黑點唔止冇改善，反而更加惡劣添，證明港府根本係大隻講。市民眼睛雪亮，正如「東方報業民意調查」顯示，大部分受訪者直指清潔運動淪為政治騷，治標不治本。
最離譜嘅係，部分衞生黑點前朝時已經存在，當時已被列為重點處理對象，點知十幾年後嘅今日仍然冇改善，簡直令人難以置信。唔怪得大部分受訪者批評港府雷聲大雨點小，清潔行動流於表面。
冇錯嘞，呢類清潔騷隔幾年就做一次，次次都係三分鐘熱度，點可能解決問題吖。呢嗱，○三年沙士係咁，○九年豬流感係咁，一三年沙士十周年又係咁，今次全城清潔運動亦唔例外，大家早就見怪不怪咯。人哋就話屢敗屢戰啫，港府搞清潔騷居然愈搞愈污糟，都唔知好嬲定好笑。
係人都知，要保持環境衞生，必須經常清潔，持之以恒，正如人要日日洗面刷牙一樣，點可以好似港府咁一曝十寒，敷衍了事o架？當年民政事務總署推出「社區清潔指數」，似模似樣咁，點知轉頭就冇咗件事；食環署亦試過喺各區衞生黑點安裝閉路電視，結果亦好似八萬五政策咁，唔再提起就表示唔存在。港產官僚平時唔燒香，臨急抱佛腳，香港有乜法子唔烏煙瘴氣吖。
正所謂，一污俱污，香港話就話係國際大都會，其實成個大垃圾崗咁，搞到蛇蟲鼠蟻為患，橫街窄巷固然污水橫流，大街大巷亦唔好得幾多。有人話香港衞生情況有時仲差過第三世界，絕對唔係誇張，當年有位外國女遊客喺中環畀老鼠咬傷，令香港臭名遠揚，就係典型例子。
當然喇，清潔香港人人有責，唔可以淨係靠港府嘅。以前嘅廣告歌都有得唱喇︰「一於響應，盡力盡本分。」如果人人響應清潔運動，盡力盡本分，香港又點會搞到污糟邋遢吖！