政情：公文袋俊男備戰青政女神
區議會選舉之後，爆出青年新政亦有意參加立法會新界東補選，打亂晒泛民陣營原先決定由公民黨（公文袋）派人競逐議席嘅部署。據聞公文袋將派出有公民黨男神之稱嘅候任丹拿區議員鄭達鴻（阿達），秘書長賴仁彪亦會喺今個星期同青年新政磋商談判，至於青年新政方面就暫時未決定搵邊個出席，如果派出女神游蕙禎，相信呢場男神鬥女神嘅會面一定非常有睇頭！
阿達尋日話，新東補選係由該黨前立法會議員湯家驊辭職引發，所以該黨會爭取派人出選，至於青年新政要求初選，佢就話唔抗拒，不過擔心初選會重蹈台灣嘅總統大選覆轍，即建制派有機會動員支持者令勝算不高嘅候選人喺民調跑出。
還價招數 「不便透露」
至於點解搵佢去傾，阿達話因為自己係青年公民主席，同青政可能較啱傾，講到有咩招數同女神討價還價，阿達就話不便透露喇！