中環出更：香港多紛爭奇談移民風
近年本港政治紛爭不斷，經濟環境亦不太理想，唔少人萌生移民念頭。尋日卓妮喺沙田馬場見到足總副主席貝鈞奇，講起香港或再湧現移民潮，佢話自己冇考慮，不過佢有唔少早年移民後回流返香港嘅朋友，最近又想再次返外國長住，原因係香港有太多負面及唔開心嘅事情發生喎！
講起香港社會嘈吵，本土派意識抬頭都係社會矛盾之一。好似早前世界盃外圍賽再有球迷噓國歌，唔知貝鈞奇覺唔覺得係反映港人對祖國歸屬感不夠？佢就話，其實換個角度睇，本土派一向都存在，好多上一代嘅上海人都鍾意話自己係上海人，其他省市嘅人亦有唔少係咁，其實與現時年輕人鍾意將自己稱為「香港人」類似。
東華三院主席何超蕸、副主席王賢誌及執行總監蘇祐安等人都有入場，蘇祐安早前由運輸署助理署長「跳船」，上任約七個多月，佢笑笑口話適應得唔錯。平日好少現身馬場嘅何超蕸就話好忙，因為要出席東華大大小小嘅慈善活動，好似即將舉辦嘅歡樂滿東華咁，連出埠旅遊時間都冇喎！
喜愛遊日 「誌」在滑雪
講開日本嚟緊計劃降低旅客購物退稅門檻以吸引遊客，旅客一日之內在一家商店購物超過五千日圓就可以辦理退稅，王賢誌話，近年喺日本買嘢原本已經算便宜，所以唔會因為新退稅政策而特別去多啲。佢一年都會去日本兩至三次，嚟緊一月就會到北海道滑雪，不過由於落雪揸車危險，所以佢哋就唔自駕遊喇！
卓妮