80後男義教街坊做運動
【記者劉敏報道】「真係唔使錢？」一般運動教練上堂每小時收費數十至數百元不等，不過八十後運動教練譚敬浩卻有錢不賺，甘願每周花三晚時間，在粉嶺義教街坊做運動及游泳，推動運動文化。由最初只有數人試玩，經過不足半年已有固定約廿人上堂，成功凝聚北區打工仔及學生齊齊上堂減壓。
200磅大懶蟲減掉30磅
「既然搵錢冇上限，自己唔需要太多使費，點解唔去幫吓人？」譚敬浩本身是游泳教練，亦是長跑好手，及後轉做文職過着朝九晚五的打工仔生活，雖然工餘時間會抽空做運動，卻發現愈做愈悶。約半年前他在社交網站Facebook成立名為「運動地帶」的專頁，自己做義工隊長，帶領上水、粉嶺居民學習正確運動姿勢，逢星期三及五晚上八時至十時在粉嶺遊樂場教學員做平板支撐及深蹲等定點運動，星期日同一時間到粉嶺公共游泳池免費教游泳。
譚敬浩坦言最初街坊不信可免費學做運動，但隨着時間推進，「運動地帶」吸納的團友愈來愈多，由年紀最大的六十多歲至最細的七歲均有，當中不少曾是懶得郁的「大懶蟲」，更有二百磅的大專肥仔成功透過運動減掉三十磅。
團友之一文太太是雙職母親，生活壓力沉重，笑言最初也不相信可免費學做運動，「見佢約在粉嶺運動場，咁多人出入，加上做運動又唔使帶好多錢出街，就膽粗粗試吓！」結果「以前唔識游水，仲做唔到平板支撐，依家叻咗，學識晒！」又指街坊一同做運動心情輕鬆，「我哋會交流吓粉嶺有咩運動場，又講吓水貨客點塞路，總之咩都傾！」