早前有外國模特兒以彩繪代替牛仔褲逛街，用以宣揚「No Pants Are The Best Pants」。姑勿論呢種行為恰當與否，單係造型已經夠晒香艷。至於喺情慾字典中，有冇同褲及Pants相關嘅詞語，同時既有趣又香艷呢？依家即刻話畀大家知啦！
喺美國嘅俚語中，Pants解作底褲，所以「Sex Pants」就解作性感迷人嘅底褲。至於喺情色俚語當中，佢有兩極嘅意思，一個係用嚟形容可以撩動男人情慾嘅性感底褲，另一個則係反義詞，指條底褲款式看似性感，卻唔能夠令男士心動咁解。講開底褲，中國古代稱底褲為褌（讀音「軍」），喺《史記‧卷一一七‧司馬相如傳》中：「相如身自著犢鼻褌，與保庸雜作，滌器於市中。」當中嘅「犢鼻褌」係一款好似牛鼻形狀嘅底褲，造型有啲似日本男士喺祭典中常穿嘅兜襠布。
「Pants Worm」嘅意思唔通係講條褲裏面有蠕蟲？搞乜嘢咁恐怖呀！大家唔使咁驚青，所謂「Pants Worm」並唔係指真正嘅蠕蟲，而係指令男士變成淫蟲嘅子孫根是也。據講因為男人興奮時，呢條蟲蟲會蠢蠢欲動係咁郁，於是就有咁嘅稱呼。講開褲襠中嘅小動物，喺英文嘅情色俚語中，亦有一個叫做「Pants Rabbits」嘅名詞，唔知大家聽過未呢？唔好見到Rabbits就係指兔仔，覺得佢一定會好可愛，原來佢係一種常見於人體毛髮中嘅寄生蟲陰蝨（Pthirus Pubis），大家千祈咪搞錯呀！
「パンチラ」寫成英文拼音為「Pantira」，而從呢個拼音中可以睇出，佢一定同底褲有關，原來呢個詞語係「パンツがチラりと見える」嘅縮寫，意思係唔小心睇到條底褲咁解，而「パンチラ」嘅精髓在於無意間露底，透過呢種非刻意走光，撩起男人嘅原始本能。如果大家有留意日本AV嘅話，就會發現女優喺挑逗男優時，都好鍾意有意冇意咁露底色誘對方，等對方睇到流晒口水，跟住兩人就上床開波。除咗AV之外，日本嘅深宵成人綜藝頻道中，亦經常見到呢類露底鏡頭，一排坐喺高櫈上穿短裙嘅女優，以走光露底嚟吸引觀眾視線。
大家咪以為《Gimme Some Pants》係一部四仔，查實佢係一首歌，不過佢又唔係一首普通嘅歌，係由著名四仔脫星、導演兼製作人Joanna Angel，夥拍搖滾樂隊The Gigolos合力炮製嘅歌曲。直譯呢首歌名，意思即係「畀條底褲我」咁解，之但係大家唔好誤會佢係一首鹹濕歌，呢首充滿搖滾味道嘅歌曲，歌詞一啲都唔鹹，反而幾有諷刺時弊嘅意味，喺2014年第31屆AVN頒獎禮中，更獲得最佳原創音樂嘅提名。當然脫星唱歌梗係有話題性，不過外界反應好參差，有人認為佢唱得夠放，亦有人覺得佢嘅歌藝一般。話說回來，Joanna Angel喺四仔界嘅地位舉足輕重，除咗有個人四仔製作公司外，更營運多個成人網站，入行多年並獲獎無數，因而被視為未來AVN名人堂嘅大熱人選。
撰文：魂