正所謂，長江後浪推前浪，一代新人勝舊人。新人事有冇新作風就唔知，但係一個人霸住茅坑唔做事，與其篤眼篤鼻阻住地球轉，不如返屋企湊孫好過喇！
區議會選舉曲終人散，最引人注目嘅莫過於多位立法會議員慘敗收場，其中建制派嘅包括民建聯鍾樹根以及葛珮帆，泛民就有公民黨嘅陳家洛、民協嘅馮檢基同埋民主黨嘅何俊仁。以上五人除咗陳家洛之外，全部都係身兼區議會嘅雙料議員，馮檢基同何俊仁更同時係「超級區議員」添。
「重量級選手」大熱倒灶，令好多人大跌眼鏡。不過諗深一層，賽果其實幾正路。有啲人參選區會，擺明為日後進身超級區議員鋪路，根本冇心扎根地區，你叫選民點揀得落手？
再講吖，呢班所謂明星級區議員唔少好似老樹盤根咁，一做就做咗十幾廿年，表現仲要乏善足陳，選民睇見都眼冤，特別係人稱AV仁嘅何俊仁，九九年擔任區議員到依家，有咩政績大家可能唔知，但懶到出汁就係人都知，佢口口聲聲重視區內交通問題，點知相關事務委員會開會，竟然試過成年都未蒲過頭，問你服未。
當然喇，AV仁不務正業，醜聞多多，呢啲只係碎料啫。除咗喺立法會議事堂偷睇艷照斷正嘅「成名作」，佢仲曾被本報踢爆屋企僭建，舊年又爆出接受財團邀請豪遊法國，正一係沒有最醜，只有更醜。唔知係咪自己知衰，AV仁敗選後強調責任主要喺自己度，要深刻檢討咁話。冇錯嘞，知恥近乎勇，與其繼續賴死唔走，出年輸埋立法會選舉淪為「雙失老年」，不如趁早自動消失，唔使丟人現眼之餘，又可以疊埋心水安坐家中狂煲AV，一舉兩得，真係諗得過o架。
話時話，今年區會選舉特別多年輕面孔，好似AV仁呢一類老古董，好多都被掃地出門。又難怪嘅，政壇同人體一樣，需要新陳代謝，注入新血正常不過，問題係，唔理好醜，只求新鮮，又係唔係好事呢？大家有眼見，今屆選戰泥沙俱下，要幾騎呢有幾騎呢，要幾激進有幾激進，有人打正本土旗號，有人鼓吹港獨，有人奇裝異服，有人扮鬼扮馬，只要夠出位，夠吸睛就有市場，唔怪得連政治經驗同社會服務都一片空白嘅所謂「傘兵」都可以突圍而出喇。
講到呢度，功夫茶不期然有啲擔心，社會愈來愈政治化，立法會唔係掟嘢就係爆粗，唔係拉布就係流會，吵吵鬧鬧，烏煙瘴氣，早就被人叫做「垃圾會」，如果出年選舉再加入一班黃絲「搞事生力軍」，市民想耳根清淨都幾難！