新民黨在今次區議會選舉派出四十二個人參選，但係只贏得二十六席，議席少過上次選舉，仲要當年新民黨同公民力量未結盟添。可能輸得太慘烈，搞到主席葉劉淑儀都變咗慌失失奇兵，口窒窒不斷講錯嘢，一向威開嘅葉劉今次真係失晒威喇。
話說葉劉喺記者會講到，今次選舉無人用佔領行動做議題，而嗰啲積極參與「拉布」同佔領、最激烈嘅政黨，區議會選舉成績都好差，舉例話公民力量同社民連。公民力量係新民黨嘅盟友，當然唔會積極「拉布」同佔領啦，相信葉劉當時係想講人民力量，但就講錯公民力量。
葉劉都好醒目，兩分鐘後就發現自己可能講錯嘢，即刻話要再補充少少，話剛才讀錯咗，舉例話「人民力量，街工，唔係，人民力量，熱血公民，社民連」，又再次講錯。葉劉喺政界打滾咁多年，有咩大場面未見過吖，睇嚟今次選舉成績真係嚇到佢有啲亂，不斷失言。
葉劉又話，今次選舉可能反映香港整體都有啲不滿情緒，好多中產有新諗法，新民黨都要研究吓，但該黨喺中產區仍然有好多票，只係下一輪選戰要努力爭取更多選民支持。