「廟小妖風大，池淺王八多。」睇吓香港郵政，就知道呢句說話形容得幾咁貼切。小小衙門烏煙瘴氣，醜聞多多，搞到被審計報告列出「十宗罪」，都算係經典咯。「東方報業民意調查」顯示，大部分受訪者狠批香港郵政內部管理鬆散，導致入不敷支，長期虧損。
講起都醜怪，香港郵政基金運作二十年來，其中八年錄得虧損，十四年達唔到固定資產回報率，都咪話唔誇張。鬼咩，郵政官僚敷衍塞責，得過且過，有乜法子唔常年虧損吖。審計署試過寄出五十件完全冇付郵費或郵費不足嘅郵件，結果八成六成功派遞，署方連向收信人徵收附加費都慳番。仲有吖，審計署喺中央郵件中心抽查五百多件郵件，約一半郵費不足，話就話只涉及幾百元，但小數怕長計，長此落去，多多公帑都唔夠蝕喇。正如上述調查顯示，多數受訪者直斥郵政監控馬虎，截查不力，唔係無的放矢。
最好笑嘅係，香港郵政之前試過抽調大量人手追數，係威係勢，結果每個月淨係超時補水就過百萬元，而追回嘅郵費只得三萬元咁大把，妹仔大過主人婆，問你服未！
講起郵政濫發超時補水，簡直係一筆糊塗帳。審計報告踢爆郵政員工上年度超時工作達一百三十多萬小時，津貼開支近一億八千萬元，甚至有員工一年加班一千四百小時，相當於每日四小時，如果話當中冇蠱惑，細路仔都唔信喇。近年傳統郵遞服務不斷萎縮，香港郵政工作量居然不減反增，係人都知道唔合理喇。呢，本報曾經揭發郵政員工集體蛇王呃超時補水，詐病又有，篤數又有，郵政官僚照批如儀，根本就係慷納稅人之慨。
面對長期虧蝕，正常嘅企業梗係諗吓點樣改善服務，開源節流，偏偏香港郵政反其道而行，一味諗縮數，唔係關閉郵局，就係縮短服務時間，結果變成趕客，唔怪得愈做愈縮。唔怕唔識貨，最怕貨比貨，新加坡郵政近年不斷開拓新業務，成功轉型為區域電子商務物流企業，反觀香港郵政不思進取，坐以待斃，完全唔可以相提並論。
老實講吖，郵政醜聞日日新款，無奇不有，又點止「十宗罪」咁簡單，淨係失信於民咋，就有排講喇。正如有人話齋，第一次犯錯係無知，第二次犯錯係愚蠢，第三次犯錯係無可救藥。香港郵政第N次犯錯，你話仲有冇得救吖？
所以話，港府民望長期低落，唔係冇理由，連小小郵政都搞唔掂，就知道管治幾咁無能。見微知著，香港郵政七國咁亂，咪就係港府施政混亂嘅縮影囉！