政情：爭短命議席 建制大廝殺
區議會選舉過後，立法會新界東補選又準備開戰，係佔領行動後首次嘅立法會選戰，有人形容係建制派與泛民主派嘅單對單對決。不過，補選議席任期極短，只有六、七個月，贏咗唔會有太大作為，輸咗亦冇咩大不了，因此泛民、建制黨派各有盤算。除泛民「鬼打鬼」，建制派亦疑派三隊第二梯隊參選，表面上好似當練兵，得票多寡或影響將來政途及出選機會，屆時落場肯定互相廝殺傷感情。
眾所周知，泛民極有機會協調公民黨楊岳橋參選新界東補選，而「新思維」副召集人黃成智都有可能參選。楊岳橋勝負較有重要意義，因為係接棒其師傅湯家驊嘅議席；相反黃成智參選就可以當熱身，甚至為其新政黨免費宣傳，反正約半年後，又到新一屆立法會選舉，喺比例代表制下，仍有機會贏得一個議席。不過，無論勝負機會如何、背後有何目的，兩名泛民對戰無可避免會分薄票源，有利建制派。
畀第二梯隊賺知名度
至於建制派方面，一直有傳會由民建聯（民記）派人出選，但新界東一向係泛民票倉，於單議席單票制方式下「隻揪」，建制派根本冇咩勝算，再加上多名個別人士(界刂)票，差唔多等於輸硬。有建制派內部人士忽發奇想，與其螳臂當車，不如出怪招，建議幫助第二梯隊練兵，或會派出周浩鼎、劉國勳及張國鈞分三條隊參選，呢個安排可以畀幾位新人賺取知名度及選舉經驗，甚至作為黨內篩選。
周浩鼎被傳會出選立法會超級議席，佢同劉國勳出選新界東都講得通，但來自港島嘅張國鈞又與新界東有何關係呢？建制派內部認為，新界東補選期間，全港只有一個選舉，各界都會留意選舉論壇，張國鈞可以喺論壇上宣傳，反正說話內容不受限制。不過，周浩鼎與劉國勳對戰，劉國勳或會取得較多票數，周浩鼎自然比下去；加上劉國勳嘅資歷及選舉經驗較為豐富，如果與周爭出戰立法會超級議席，隨時出現爭拗及造成內耗。