中環出更：玩俄羅斯方塊 楊偉雄捧蛋
剛上任嘅創新及科技局局長楊偉雄，尋日出席香港電競總會創會典禮及電子競技表演賽，身體力行支持新興電子競技行業，並參與競玩經典電子遊戲俄羅斯方塊嘅終極版，可惜以零分大敗畀該會副主席楊全盛及主席周啟康。
初哥對老手 無懼落敗
遊戲比賽以四人對賽形式進行，除咗楊偉雄、周啟康、楊全盛參賽外，仲有政府資訊科技總監楊德斌。賽事開始前四人已先展開牙骹戰，面對自細已玩俄羅斯方塊的周啟康及大學時代學寫過該遊戲程式嘅楊全盛，楊偉雄就淡定話「凡事都有第一次」，仲話「輸咗都冇問題」喎，鬥志一般，似乎預咗會落敗，如果用咁嘅心態推展香港創新科技發展，咁就真係弊喇！
果然比賽開始幾分鐘，楊偉雄與楊德斌已「game over」，連一分都未攞到就戰敗。不過，楊偉雄就話童年時玩開一款叫「pong」嘅遊戲，今次首次玩俄羅斯方塊遊戲，捱到幾分鐘算唔錯喎。
卓妮