中環出更：搞事四人幫 懶得去助選
尋日區議會投票日，被指為「搞事四人幫」嘅「民主阿婆」前政務司司長陳方安生、「李漢奸」民主黨創黨主席李柱銘及壹傳媒集團前主席黎智英（肥佬黎）各有各忙，但並非四出為朋黨拉票，而係一個去恤髮、一個去行山、一個去歎茶，完全hea爆。
政治影響力所餘無幾
李漢奸早上七點幾鐘就出門口，並非去為黨友助選，而係去山頂與外籍好友行山。兩人喺盧吉道行咗兩個圈，李漢奸就返屋企，到差唔多中午十二時先由老婆車去香港公園票站投票，投完票又返屋企，直至傍晚先外出到中環香港會所食晚飯。去年三月南區區議會海怡西選區補選，都見李漢奸落區幫黨友單仲偕拉票，可惜單慘敗。未知係咪自知政治影響力所剩無幾，所以費事再助選「佗衰家」？
至於民主阿婆早上近九時曾到司徒拔道幫「傘兵」區麗莊拉票，但企咗半個鐘就返屋企，之後再坐的士去銅鑼灣恤個靚髮。恤髮後就穿梭商場購物，血拼差不多個半鐘，結果手挽五大袋戰利品返屋企。直到下午兩點幾鐘，民主阿婆又再出動，今次係同民政事務局前任常任秘書長李麗娟於大潭雅柏苑短敍。相比四年前區選投票日，佢與李漢奸一齊喺山頂選區幫公民黨陳淑莊站台，又向選民揮手，似乎佢嘅動力與影響力一樣已到尾聲。
作為泛民主派最大「金主」嘅肥佬黎，尋日下午點幾鐘先出動去尖沙咀歎茶，三點左右再去太子道票站投票，全程好低調。至於長毛，朝早喺港島區幫人助選，但就無趁特首去票站投票踩場叫口號。卓妮於是打電話問長毛係咪安排咗秘密行動，點知佢就話：「完全唔記得今早特首去投票，你哋走啦，我唔會嚟(口架)喇！」長毛竟然連搞事都唔記得，莫非長毛無「水腳」去示威？
卓妮