政情：今日你上鏡：葉劉帶病死頂撐老友

近期天氣反反覆覆，真係好容易病倒，立法會議員葉劉淑儀就率先中招，但聲沙沙仍出席朋友謝悅漢嘅新書發布會撐場，認真唔話得！葉劉話，自己近個半月非常忙碌，由朝做到晚，導致免疫力降低，喺新書活動後去睇醫生先知受病毒感染，醫生仲建議佢多休息添。不過，葉劉就唔係好聽話嘅病人，佢話要等手頭上工作完成，過多幾日先有得抖吓，難怪佢喺活動上無平時咁口齒伶俐喇。流感高峰期將至，葉劉出席活動就要記得戴番個口罩喇！