中環出更：任期得年半 展「雄」圖需時
經歷立法會三年半「拉布」，創新及科技局（創科局）終於喺前日成立，但就拖到局長楊偉雄（Nic）任期只得一年半，外界都擔心佢能否做到自己提出嘅九項重點工作。不過，Nic尋日就向公眾大派定心丸，表明時間唔夠並非問題喎。
Nic話，唔會分先後次序處理九項重點工作，因為九項工作同樣重要，要同時進行，佢仲透露有啲工作已經喺創科局成立前開展咗添！不過，佢都承認，依家要追番失去嘅時間，但強調無時間唔係問題，並唔代表乜都唔做，仲講明要靠廣大市民合作，再同業界溝通去得出細節，希望大家畀機會同時間佢喎。
對構思信心爆棚
現時好多工業都毋須佔用太多空間，Nic話會搵有經驗嘅人，利用創新科技去創造適合香港嘅工業，又強調自己知道點樣做，更再三重複畀時間佢工作呢個希望，認真長氣。佢到最後仲大賣關子，好風騷話無人想聽佢講「再工業化」嘅細節，因為會覺得佢太誇張，睇嚟佢對自己嘅諗法信心爆棚，一定極為創新嘞，希望創科局唔好令人大跌眼鏡啦！
卓妮