中環出更：忠實食客 象哥現身頒獎禮
香港中小型企業聯合會日前舉辦「香港星級品牌2015」頒獎典禮，唔少大家都熟悉嘅本地品牌亦有獲獎。近期落力籌備邊境購物城嘅進出口界立法會議員黃定光（象哥）都有現身，佢一見得獎者之一嘅譚仔三哥米線主席譚澤群，就主動話要過去認識吓，皆因佢係呢間店嘅老食客喎，認真搞笑。
象哥話，其實佢九十年代開始已經幫襯當時仲係做蘭州拉麵嘅譚仔，好清楚記得當時深水埗永隆街間舊舖只得半邊舖位，地方淺窄，但佢第一次食就已經覺得一試難忘，從此愛上呢種味道。
人口老化 另有商機
譚澤群透露，自己年輕時從事冶金，但後來變成下游工業時只好另覓出路，而佢過往公餘時間最愛下廚，故當年選擇創業做飲食。佢話，做飲食要捱得苦，好似早前佢學整拉麵，就足足學咗六年咁耐，為咗練習拉到每條麵粗幼同口感都一樣，練到兩、三張枱都爛晒。
獲獎嘅四十七間本港企業中，仲有專門提供長者服務嘅文化村，該公司董事總經理羅凱寧（Stephanie）話，曾於日本留學，發現當地非常着重長者生活質素，例如在百貨公司內會有一層專賣長者用品，相反香港長者用品款式少又舊，但本地人口老化問題嚴重，認為港人對長者日用品需求及要求均會提升，因此生產及引入不少長者商品。
EDO行政總裁黃偉鴻嘅公司亦有得獎，講到零食，佢話除咗每次去日本及韓國等地留意有冇新口味零食外，佢嚟緊仲會玩復古，引入懷舊產品如玻璃樽裝綠寶等，勾起港人集體回憶，讓大家重溫童年往事。
卓妮