「狼來了」嘅故事大家耳熟能詳，港產官僚尤其樂此不疲，財政預算案固然經常亂咁估，連都市固體廢物量及回收率亦報大數，問你服未。
係咁嘅，審計報告揭發環保署喺計算都巿固體廢物量及回收率時，竟計埋數量不明嘅進口海外廢料，令上述兩項指標被高估，唔止回收率被扭曲，而且造成堆填區提早爆滿嘅假象。例如○五年至一○年，都巿固體廢物由六百萬噸增加一成半至近七百萬噸，回收率則由四成三增至五成二，其實主要因為進口廢料增加咋。
審計報告仲踢爆環保署推行生產者責任計劃歎慢板，十年前已推出政策大綱，就膠袋、廢電器電子產品、汽車輪胎、飲品玻璃樽、包裝物料及充電器等六種產品，推行生產者責任計劃，點知拖到依家除咗膠袋稅之外，其餘產品仲係無聲無息。更離譜嘅係，棄置於堆填區嘅膠袋數量遠遠高於零售店申報嘅派發量，而環保署一直矇查查，你話係咪失職吖。
仲有吖，環保署當年係威係勢推行「惜食香港運動」，話要珍惜食物，減少廚餘，講到天花龍鳳，可惜有姿勢冇實際，結果廚餘不減反增。環保署曾邀請十二個政府部門簽署《惜食約章》，點知截至今年六月只有四個部門肯簽署，其餘八個部門一直耍手擰頭，直至審計署審查後，簽署部門至增加到十個，但食環署及房屋署呢啲需要管理大量廚餘嘅部門始終唔肯簽，唔怪得審計署批評政府部門及公共機構冇以身作則喇。
最好笑嘅係，港府斥資一千六百二十萬元興建嘅九龍灣廚餘試驗處理設施，當時聲稱每日最多可接受四噸已分類廚餘，但今年九月改口向審計署稱每日只可處理一點三七噸，而審計署調查後更發現相關設施處理量嚴重偏低，今年上半年日均處理量只有零點六五噸，環保署擺明又係報大數喇。
所以話，港府環保講一套做一套，都唔知邊句係真，邊句係假。早前有環保團體調查發現，香港浪費食物情況嚴重，淨係食環署管理嘅七十五個公眾街市，每日就棄置剩菜十四噸，最離譜嘅係環保團體向食環署申請到公眾街市收集剩菜，署方居然聲稱無申請方法，又指活動無先例，拒絕提供援助。你話嘞，連政府部門都唔肯為環保提供協助，廚餘有乜法子唔愈來愈多吖。
一句講晒，信佢一成，雙目失明。港府環保做騷咁做，甚至弄虛作假，唔怪得搞來搞去得個吉，旨意佢哋減廢，蚊都瞓蛇都死喇！