中環出更：邱副又拒覆機 波士擋箭
運輸及房屋局副局長邱誠武（邱副）○八年上任無耐，因為處理的士短加長減問題，被立法會議員梁耀忠踢爆唔覆新界的士司機權益大聯盟主席嘅電話，仲要反問「你威脅我呀？」結果激嬲班的士大佬，搞到的士堵塞交通收場，最終要時任局長鄭汝樺出面解畫及「耍冧」。點知事隔多年，有人投訴邱副仍然死性不改，最近就因為汲水門撞橋事件觸怒議員，仲要局長張炳良親自回覆！
地區投訴拖幾個月
汲水門撞橋事發當晚，大家都很擔心機場變孤島，原來當晚有議員曾經打電話聯絡邱副查詢交通安排詳情，點知邱副全晚無影，到翌日要勞煩張炳良回覆。又有議員投訴，在鉛水事件，曾經問過邱副有關驗水事宜，結果又是張炳良回覆！邱副不但大事無回覆，小事亦一樣，試過有投訴人搵佢解決地區問題，佢拖咗幾個月先至搵同事跟進，做完又唔回覆投訴人，搞到投訴人發火。
邱副回覆查詢時話，汲水門撞橋事件發生期間，有好多電話往來，部門同事需要了解事件，無可能即時回覆到議員，而同事之間亦都有唔同嘅分工。至於地區問題，邱副話應該係由地區部門去處理，並非樣樣都係由政策局去做喎。被問到點解無回覆投訴人，邱副竟然話最重要嘅係事件已經解決喎！不過，有關投訴都唔係佢處理，如果連回覆投訴人都懶，咁佢真係可有可無喇！
卓妮