中環出更：工商界人手荒「更生」力量補血
工商界成日呻難請人，與其等政府輸入外勞，倒不如諗計「自救」。中華廠商聯合會（廠商會）會長李秀恒（Eddy）及商界助更生委員會主席何偉權（Ken），尋日同幾位僱主代表齊齊聚頭，為下月四日舉行嘅更生人士視像招聘會搞宣傳。Ken話，為即將獲釋嘅更生人士配對搵工，一來有助降低重犯率，二來可為企業補充勞動力，去年推出後極受商界歡迎，所以今年一於再接再厲大搞。
Ken話，今年參與招聘會嘅企業約四十間，提供職位空缺逾九百個，主要供將於三個月內獲釋人士搵工。佢讚更生人士抵諗又肯捱，而僱主唔會透露佢哋嘅背景，有助盡快融入社會。佢同Eddy都係有份提供職位嘅愛心僱主，Eddy就呼籲更多商界支持。
郭棟強呻建築業長期缺人
做建築生意嘅永明集團董事總經理郭棟強及海棠物流創辦人梁雄輝都呻請人難，梁雄輝仲話，都唔知依家啲後生仔去晒邊。郭棟強就話，去年佢請咗廿名更生人士，至今仍有一半在職。佢呻建築業幾時都唔夠人用，所以好支持計劃，呢行亦相對受更生人士歡迎，因為人工高，地盤雜工日薪都有六至八百元。
建築業咁高人工，做環保回收嘅億達再生資源市場部經理蕭玉琴聽完笑稱，難怪佢哋請唔到人喇！佢話今年好寄望喺招聘會搵到人，事關佢公司喺屯門新落成嘅環保廠需要大量低技術工人。佢認為計劃好正面，印證只要有手有腳，喺香港一定搵到嘢做，人人皆可用雙手創造未來。
卓妮