政情：陳鑑林搶韁護丁權
立法會尋日討論丁屋問題，泛民主派議員郭榮鏗提出口頭質詢，指香港面對嚴峻土地問題，質問政府有無計劃減少興建丁屋嘅土地。新民黨葉劉淑儀就重提早前有官員講過，二○二九年就不再執行丁權，亦有議員重提鄉議局提出興建高樓嘅方案，讓擁有丁權嘅原居民分配單位。咁啱「新界王」劉皇發（發叔）仍住院留醫，無代表護航下原居民利益岌岌可危。
愛妻亦為原居民
不過，作為原居民女婿嘅議員陳鑑林（橄欖）就挺身而出，為原居民出頭發聲。佢話原居民丁權受《基本法》保障，唔應該將丁權同大眾住屋需要造成對立，更毋須因此剝削原居民。橄欖咁關心丁權，某程度因為佢住喺沙田十二笏村好多年，老婆係原居民，現為居民代表，而外父亦曾經做過村代表，作為既得利益者，當然要發聲啦！
發展局局長陳茂波（波叔）回應話，政府認同有檢討丁屋政策嘅需要，但興建丁屋需求難以預計，加上丁屋問題牽連甚廣，涉及歷史、法律、環境、土地需求等複雜問題，需要仔細檢視及研究至得，但政府無既定立場，目前只會用管控手段去控制丁屋發展，無地就唔批准建屋。