立法會人事編制小組委員會尋日開會，唔知係咪因為早得滯未瞓醒，主席葉劉淑儀竟然多次甩轆。佢除咗將議員嘅發言時間講咗做零分鐘之外，仲要將「處理」講錯做「處決」陳偉業（大舊）添！大舊亦不是省油的燈，佢就話自己係「政壇鐵漢，頂得住」喎！
人事編制小組委員會開會續議運輸及房屋局轄下成立嘅機場擴建工程統籌辦公室嘅三個職位開設申請，再遇「拉布」議員阻撓。大舊約於九時提出終止待續議案，同時提出十一項議案。表決議案時，葉劉本來想宣布陳偉業提出嘅議案被否決，卻誤講為「陳偉業被處決」，引來在場議員嘩然。
社民連「長毛」梁國雄隨即在發言時大造文章，稱「葉太你唔好處決我呀」；大舊亦笑稱自己是「政壇鐵漢，頂得住」喎。葉劉隨即為誤將「處理」講成「處決」道歉。在「拉布」議員嘅阻撓下，會議延長十五分鐘，最後以廿三票贊成，五票反對，順利通過機場三跑工程嘅三個職位開設申請。
