中環出更：署長為楊偉雄護航
創新科技局明天成立，轄下將會有創新科技署及政府資訊科技總監辦公室，盛傳出任局長嘅特首創新及科技顧問、行政會議成員楊偉雄（Nic）尋日同未來下屬、即係創新科技署署長蔡淑嫻一齊出席一個開幕禮。未開始前，Nic啱啱同記者打完招呼，蔡淑嫻就「搶閘」為未來上司楊偉雄「擋駕」，急急講明Nic唔做訪問，仲拉走Nic添，唔知嘅仲以為佢係工作人員！
創科署否認曾代言
政府未公布創科局局長人選，Nic同蔡淑嫻並非上司下屬嘅關係，蔡淑嫻搶閘出來擋駕，似足局長新聞秘書，唔知嘅仲可能誤會佢係大會工作人員添，作為署長做埋呢啲工作，可以話係降格，不合身份！我哋曾經向創科署查詢蔡淑嫻嘅做法係咪合適，但該署就否認署長有為楊偉雄「擋駕」或代言。
講番Nic喺開幕禮結束後，笑笑口話：「你星期五之後先問我啦！」真係畫公仔畫出腸喎！而佢致詞時就提到，早前同特首一齊去以色列交流，當時有位嘉賓提到今次係第四次創業，過去已經失敗了三次，Nic就用呢個例子說明，要接受多次失敗，才能創造最終嘅成功。呢個例子都頗似創科局嘅成立過程，睇嚟Nic感受一定好深嘞！
卓妮