中環出更：家事案陰影 「寧」做租務律師
律師處理案件時會面對形形色色嘅人，有時都驚險。愛沙尼亞共和國駐港名譽領事林建康（Matthew）做合夥人嘅鄭黃林律師行，同全球排名一百大嘅美國尼克松（Nixon）律師行合併，早前在中環香港會舉行慶祝酒會，本身是律師嘅Matthew太太林黃寧艷（Lianne）講起打官司嘅經歷，靚太話最難忘當年打法援官司時嘅驚嚇場面。
Lianne啱啱出道時曾經名列法律援助署嘅法援律師名冊，有次佢喺一宗家庭糾紛中代表太太一方，喺法庭外，嗰位丈夫竟然衝過來打太太，Lianne想拉都拉唔切，自己又好驚，至今諗起都心有餘悸，事關冇諗過打官司都會遇到咁暴力嘅場面。依家佢喺丈夫Matthew嘅律師行工作，主要處理租務案件，確係簡單又安全得多。
應家柏上海菜「防癌」
當晚到賀政商界人士好多，包括馬會行政總裁應家柏及太太林平（Winnie）、太子珠寶鐘錶主席鄧鉅明及太太鄧宣宏雁（Emily）、申訴專員劉燕卿等人。港澳台灣慈善基金會總理胡慧中都有到場，佢係Lianne相識多年嘅好友；而長實集團執行董事趙國雄亦有出席酒會支持Matthew。
Emily早前不小心滑倒，在家休養兩個幾月，今次為咗好友復出，認真有心。講起最近加工肉類被列為第一類致癌物，德國香腸世界聞名，唔知身為德國人嘅應家柏點樣取捨呢？Winnie就好輕鬆話，丈夫鍾意食上海菜喎！
卓妮