講就天下無敵，做就有心無力，係港產官僚嘅最大特色。港府揚言未來十年興建四十九萬個住宅單位，當中包括二十九萬個公營房屋，講就好聽喇，可惜純屬吹水，未來五年新落成嘅公營房屋只得九萬七千幾個單位，距離目標一大橛，十年大計根本冇可能實現。正如「東方報業民意調查」顯示，大部分受訪者認為建屋目標並無考慮土地供應量，執行困難，不切實際。
又難怪市民睇得咁淡嘅，現屆政府話就話將房屋問題列為施政重中之重，一時見縫插針，一時寸土必爭，結果眼高手低，乜都做唔到。唔使講咁多，淨係睇吓公屋輪候人龍愈排愈長，就快突破三十萬大關，距離三年上樓目標愈來愈遙遠，就知道房屋問題有幾嚴重。
冇計喇，港府無能，加上社會泛政治化，覓地建屋阻力重重，寸步難行，房屋問題有乜法子唔愈來愈嚴重吖。早排有智庫建議將部分生態價值較低嘅郊野公園改為建屋用途，本來值得認真考慮（口架），點知港府高官呢頭話諗得過，嗰頭又話無意打郊野公園主意，自打嘴巴，問你服未。
正如業界人士話齋，香港綠化土地面積仲多過新加坡同倫敦，當初規劃郊野公園時人口只有五百萬，依家人口增加咁多，改變土地用途無可厚非。可惜，講係一回事，做係另一回事，喺今時今日嘅社會及政治氣氛下，打郊野公園主意盞引起爭議，添煩添亂嘅咋。所以話，弱勢政府百事哀，新加坡一樣係地少人多，人均居住面積大過香港多多，其中唔少土地就係填海得來，人哋做得到，港府做唔到，講乜都冇用喇。
最好笑嘅係，家陣一屋難求，無殼蝸牛等上樓等到頸都長，智庫居然建議賣公屋，令八成市民成為業主喎，簡直係天方夜譚，比畫餅充飢更荒謬。上述民調顯示，大部分受訪者認為當局拓地建屋有心無力，八成市民成為業主嘅建議不切實際，無可能做得到。
再講吖，就算港府搵到足夠土地，亦未必可以追回建屋進度，事關家陣建造業人手緊張，加上培訓課程不足，冇年輕新血補充，想趕工建屋都唔得喇。本地工人不足，本來可以請外勞搭夠，新加坡就係咁做，弊在香港政客乜都反對，乜都拉布，請外勞喎，諗都唔使諗吖。
歸根究柢，房屋問題之所以積重難返，皆因前朝政府無所作為，嚴重扭曲房屋市場，現屆政府面對呢個爛攤子，根本無能為力。冇安居就冇樂業，房屋問題死結難解，社會怨氣難消，香港只會永無寧日！