積金局上星期公布推出強積金核心基金，管理費規限唔超過百分之零點七五，坊間有人就形容呢個係為懶人而設嘅基金。財經事務及庫務局局長陳家強尋日喺網誌就力銷核心基金，話唔少人公務繁忙，如果有一個均衡投資唔同嘅資產類別，並自動隨投資者年齡調整風險嘅投資策略，會係一個精明選擇，所以識揀嘅人其實係「基金達人」喎。其實好多打工仔已經做咗好多年「懶人」，管理費已被賺到盡，要蝕錢嘅亦蝕咗一大截，十五年後先至忽然幫懶人變達人，會唔會遲咗啲呢？
