政情：一索得男 郭偉強生仔大晒
今年初小登科「成個老襯，從此士氣大振」嘅勞工界立法會議員郭偉強，早前宣布老婆有咗，日前佢就開心話超聲波照到BB係男仔，預產期喺明年三月，到時佢咩都唔理，一切以太太為先。佢又話，依家每晚都會同太太肚內BB傾下偈、聽吓音樂，睇嚟佢都好陶醉初為人父嘅喜悅喎。
朋友間交流育兒經
雖然第一胎未生，郭偉強已經講定希望生夠兩個，但最終決定權在於太太，因擔心太太生育太辛苦，其實一個仔已經好滿足喇。
講到新手爸爸有咩要預備，郭偉強話，咁啱佢有幾對中學同學夫婦都剛剛為人父母，大家會互相交流消息，佢最近就報咗課程，預備同太太一齊上堂。至於黨友麥美娟（Alice）都戥郭偉強高興，但見Alice近日都清減不少，唔通因為郭偉強要照顧家庭，Alice要做埋佢嗰份？Alice就話唔係，只係最近落區擺街站時經常「食風」，最後搞到肚痛，唔知係咪因為咁要愈來愈瘦呢？