政情：馬時亨：出差寶貴 勿怕捱苦
商務及經濟發展局前局長馬時亨（肥亨）尋日出席金融發展局就業資訊日，與年輕人分享自己喺金融界嘅工作經驗。肥亨分享當年第一次見工，面試官考佢唔熟識嘅會計知識，最後佢誠實話自己唔識，但最後都過關。之後佢又分享當年外派去美國紐約工作嘅經歷，曾經因為不捨得香港家人而猶豫過，仲自爆人生第一次喊就係美國工作嘅時候。
寄語青年誠實面對僱主
肥亨話，當年佢主修經濟同歷史，所以唔識面試官所問嘅會計知識，不過除咗坦白話自己唔識，都有作吓古仔扮識嘅。好彩面試官都接受佢嘅古仔，仲讚佢誠實添。呢個經歷令佢明白到，唔一定要搵番自己修讀科目嘅相關工作，而要多嘗試，佢仲同年輕人講，要誠實面對僱主。
當年資訊科技無依家咁發達，通訊都唔係咁方便，肥亨坦言，就算有咩工作上唔開心都唔可以即時同家人講，所以當年都有猶豫過去唔去美國工作。不過，佢之後諗番，雖然獨自出外工作會倍感孤單，亦因工作壓力大而喊過，但覺得對自己有幫助，所以鼓勵在場年輕人唔好怕，要珍惜外派工作機會。