中環出更：方丈換人風波 健釗激動
寶蓮禪寺尋日舉行第八任方丈淨因陞座典禮，第七任方丈釋智慧正式退下。對於近日紛紛擾擾的佛教界是非，釋智慧只簡單回應「放下」及「我都係睇你哋寫咩」。淨因方丈則指，釋智慧對寶蓮寺的貢獻無法否定，永遠是寶蓮禪寺的長老，至於寺方未來發展大方向將着重文化、教育及淨化心靈上。
儀式完結後，釋健釗長老及淨因方丈接受傳媒訪問，談及未來發展方向，但一提起早前定慧寺主持釋智定假結婚事件，淨因就立即封口，改由經驗豐富的健釗代為應對。健釗面對傳媒尖銳提問時對答如流，又引用例子稱掉一塊磚頭落水時會引起漣漪，但無第二塊磚頭掉落，水面就會慢慢平靜，話傳媒不斷追擊同一個問題等於不斷投石落水，無法靜下，與佛家追求寧靜背道而馳。
「你哋記者多事」
健釗理解傳媒為何追問，但認為自己無處理社會呢啲複雜問題嘅責任，亦無執法權力，只能靜觀其變，強調事件非傳媒或佛教界能夠解決，只有法律能處理。不過，佢話咁做並非代表放任，至於是否需要整頓佛門，佢話出家人違反戒條就已喪失出家人的資格。
講到點解新方丈唔係之前傳聞接位嘅宏通法師又或佢本人時，原本氣定神閒嘅健釗長老就面色一沉。話說釋智慧嘅方丈之位，本傳聞係健釗繼位，但後來釋智慧改口風，於活動上指宏通法師係「未來方丈」，誰知最後兩人均失落方丈之位，新方丈變成淨因。
當問及此事因由時，健釗長老就話：「如果將個責任塞畀你哋記者，就係因為你哋多事，所以兩個都做唔到！」及後即轉身離開，估唔到一向咁淡定嘅健釗長老咁激動！
卓妮