古人教落︰「為政不在多言，顧力行何如耳。」港府口口聲聲發展郵輪經濟，吸引高消費旅客，仲話要發展成區內嘅樞紐添，講就好聽嘞，實際又點呢？
不妨聽吓專家點講。理工大學酒店及旅遊業管理學院日前發表啟德郵輪碼頭競爭力報告，指過去十年全球對郵輪碼頭嘅需求上升六成八，當中亞洲區冒起速度最快，估計到二○二○年，亞洲對郵輪旅遊嘅需求將佔全球約兩成。
蛋糕愈做愈大，香港有近水樓台之利，照計可以分一杯羹，問題係鄰近港口早就虎視眈眈，除咗廣州及深圳全力發展郵輪經濟，新加坡同上海亦爭相打造區域性郵輪樞紐，連海南三亞都話要趕搭「一帶一路」嘅快車，成為亞洲最大郵輪母港，面對咁激烈嘅競爭，香港究竟有咩優勢呢？
本來呢，香港地理位置得天獨厚，國際航道四通八達，最適合發展郵輪旅遊，可惜港府拖拖拉拉，議而不決，啟德郵輪碼頭由規劃到竣工，足足拖咗十幾年，早就坐失先機。姍姍來遲都算嘞，最搞笑係呢個耗資八十二億元興建嘅碼頭啟用後問題百出，甩漏多多，連最基本嘅交通配套都天殘地缺，每次有郵輪泊岸都搞到七國咁亂，甚至曾出現幾千名旅客喺的士站打蛇餅等車嘅奇景，旅客固然怨聲載道，香港更加臭名遠揚。學者警告，呢啲問題一日唔解決，就算郵輪經濟帶來再多商機，香港都係有得睇冇得食嘅咋！
即係咁，亡羊補牢，未為晚也，硬件唔夠可以增加，軟件不足亦可以改善嘅啫。正如學者話齋，港府可以向鄰近地區加強市場推廣，充分利用港珠澳大橋以及廣深港高鐵帶嚟嘅優勢，允許旅客喺船上辦理入境通關手續，以及開拓更多新港口等。呢啲建議無疑用心良苦，問題係港府聽唔聽得入耳呢？早排有團體建議喺碼頭平台花園發展酒吧一條街，打造東九龍新地標「啟德蘭桂坊」，預計每年營業額高達數千萬元，業界反應熱烈，可惜港府反應冷淡，闊佬懶理，結果又係不了了之，呢啲咪就係捉到鹿唔識脫角囉！
見微知著，郵輪業優勢漸失，正正係旅遊業不思進取嘅縮影。本港旅遊設施十年如一日，嚟嚟去去嗰幾個，唔係迪士尼樂園，就係海洋公園，你唔厭旅客都厭喇，加上旅遊業醜聞無日無之，有人趕客，有人劏客，係人都怕怕喇。
一句講晒，黃台之瓜，何堪再摘。旅遊業已經得番半條命，再唔諗計救亡，一味食老本，到頭來盞孤芳自賞，郵輪碼頭遲早拍烏蠅都似！