政情：李宗德推廣女足：預防癡肥
踢波唔一定係男仔嘅運動，有唔少女仔都鍾意踢足球，有見及此，和富社會企業會長李宗德（Joseph）近期就贊助女子足球隊，佢話香港女子足球水準在東南亞地區唔差，近期仲有幾個球員去日本試腳添。
衝撞較男足少
Joseph話，依家佢哋會嘗試「入校」推廣女子足球，有時就會遇到個別家長太過愛錫女兒，怕個女整傷，未必敢畀女兒踢波，但呢啲都係好個別例子，其實唔少家長都肯畀個女試吓嘅。
咁女仔同男仔踢波有咩分別呢？Joseph話，其實女仔踢波冇男仔咁多衝撞，考技術多啲，都唔使咁驚會整傷，而足球都係一種好嘅運動，年輕人可以郁動多啲，預防癡肥都唔錯，好過留喺屋企打機啦！