中環出更：達人重教育 當係投資
近年香港嘅大學生變得嘈吵激進，不少商界人士對捐助大學顯得心淡。早前一班浙江幫在四季酒店歡聚，多年來熱衷捐助教育嘅香港浙江省同鄉會聯合會（浙聯會）創會會長李達三都有到場，佢淨係今年就分別捐贈一億元畀港大、中大及城市大學作為研究醫學之用，莫非佢唔介意嘥心機？
李達三笑笑口話，今時今日嘅學生只係比較追求自我，但係始終係少數。佢經歷過日本侵華戰爭，認為教育先至係民富國強嘅根本，所以唔當資助大學係捐錢，而係投資喎！
當日好多政商名人出席，包括浙聯會會長詹耀良、副會長陸雅儀、保良局總理顧東華、詹耀良姪女兼「香港手套大王」第二代詹嘉莉及范氏慈善信託基金主席范鴻齡等人，場面好熱鬧。
「仲尼」努力檢視TSA試題
李達三嘅孫子聲寶—樂聲（香港）主席李本俊（Kenneth）都有到場，Kenneth自細就在新加坡長大，由於家族在新加坡投資酒店，所以佢經常星港兩邊走，亦見證近年香港被新加坡扒頭。Kenneth話，若果大家唔停止無謂爭拗，情況只會更加不妙。
考試及評核局主席陳仲尼（Rock）及父親「製衣大王」陳元鉅都有到場。阿Rock最近好忙，事關全港性系統評估（TSA）備受爭議，考評局負責提供評估試卷，梗係唔能置身事外啦！阿Rock話，已要求同事檢視吓試題，睇吓係咪如外界所講太難，希望有科學數據去回應社會嘅關注。
卓妮