鄰居婆婆讚印傭救命恩人
【本報訊】與湯伯為鄰的陳婆婆，七十年前搬入九華徑新村，現時與兒子、媳婦及印傭同住，與湯伯是幾十年的好朋友，「晚晚大家出嚟喺條街度乘涼傾偈」，婆婆家人稱會原諒湯伯。至於護主受傷印傭Bibit暱稱「嘉嘉」，於○八年來港，陳婆婆一家是她服務的第四個僱主。陳婆婆在案中檢回一命，額頭受傷縫七針，婆婆出院後激讚嘉嘉的英勇，今次幸得嘉嘉捨身相救，「如果唔係佢擋住我就死咗啦，佢係救命恩人，會封番封大利是畀佢！」
陳婆婆憶述事件表示，事發時湯伯持斧頭走去家門，並不斷用斧頭劈鐵閘，終斬爛鎖入屋，「直頭有個凹痕！」印傭嘉嘉走出客廳查看，見湯已推門入屋，手持斧頭及鎅刀，全身披血，大驚問：「咩事呀！」湯大喝：「唔關你事，你行開！」然後將嘉嘉推開。
「嫲嫲快啲走報警」
陳婆婆稱：「佢逐間房裝裝下，應該係搵我。」嘉嘉見形勢不妙，立即走入睡房叫醒她，並着她報警求救，「我揸住個電話撳撳下，都唔知撳咗咩，太驚呀。」陳婆婆又問：「咩事呀湯生?」惟對方無回應。她與嘉嘉即匿入睡房，以身體頂緊睡房玻璃門，其後玻璃門被斧頭四、五下劈爛，碎片濺出，又見玻璃門裂縫伸出斧頭，婆婆額頭被斧柄鑿傷，形成「L」字形傷口流血。
嘉嘉見狀撲前攬緊湯，又踢向其下體，將他推跌在梳化上，並用力壓緊斧頭大叫：「嫲嫲快啲走！快啲打電話報警！」陳婆婆趁亂逃出，幸嘉嘉事後亦安然逃出，主僕二人逃至村公所求助，始知女書記被斬傷。
陳婆婆昨晚出院到女兒家休息。她猶有餘悸，慶幸主僕二人無大礙。嘉嘉事發後稱：「平時佢（湯伯）都好好人，冇嗌交。」她對未能保護好婆婆感內疚，曾哭說：「嫲嫲！對唔住呀！我保護唔到你！」但婆婆對嘉嘉讚不絕口。陳婆婆女兒亦未有責怪湯伯：「佢媳婦都同我哋道歉，我哋都會原諒佢。」