香港經常畀人批評缺乏旅遊景點，嚟嚟去去唔係星光大道就係主題公園，悶都悶到遊客抽筋。其實計功夫茶話齋，唔係香港冇旅遊景點，而係官僚冇腦袋，有再好嘅旅遊資源，捉到鹿唔識脫角，都係嘥氣嘅啫。
話說民政事務總署幾年前根據作家小思《香港文學散步》嘅概念，以蔡元培、張愛玲、胡適、許地山同蕭紅等五位文學家所到之處，串連成一條「南區文學徑」。文學徑七月開幕，計劃中嘅五個地標亦已經完成三個。本來呢，尋找大師足迹呢個概念係唔錯嘅，外國好多名人故居已經成為著名景點，可惜吖，橘越淮而枳，港產官僚志大才疏，眼高手低，宣傳少，配套差，真係大師都畀佢哋激番生吖！
唔係講笑o架。有人帶埋一家大細遊文學徑，諗住寓教育於遊樂，結果敗興而回，佢批評文學徑好似斷橛禾蟲咁，搭車仲耐過遊覽，「文化遊」淪為「巴士遊」，簡直吹脹。所謂嘅地標，同樣令人大失所望，有啲淨係擺幾張櫈、幾個銅牌同文字簡介就算，幾下手勢就睇完。最好笑嘅係，連喺赤柱讀書嘅學生，都唔知學校對面已經設置同胡適有關嘅景點，可想而知當局嘅宣傳攻勢有幾咁「凌厲」。
講開又講，港府推廣文化不力，早就有口皆「悲」，第樣唔講，淨係講博物館一瓣，就輸足人哋九條街，好似台灣咁，無論係改建自日佔時代嘅國立博物館，抑或前身係小學舊址嘅台北當代博物館，都搞到有聲有色，其門如市。反觀香港，博物館多就多嘞，可惜冇特色得嚟又散修修，東一間西一間，淨係同海有關嘅就有海防博物館、滅火輪展覽館以及海事博物館等，名目多到連本地人都一頭霧水，仲點吸引遊客吖。
其實唔使講到咁遠，一海之隔嘅澳門，喺保育文化資源方面已經叻過我哋多多聲，歷史城區十年前已經被列入世界文化遺產名錄。香港呢，連保育一座小小嘅景賢里都搞出個大頭佛，根本無得同人揮。有人曾提出將九龍城區內多個歷史景點串連成文物徑，市民多一個去處之餘，又可以推動文化旅遊產業，點睇都係好事，點知你有你講，政府有政府懶懶閒，一味話研究緊，研究得來蛇都死喇。
見微知著，港府連咁簡單嘅一條文學徑都搞到唔湯唔水，不倫不類，仲未學行先學跑，興建西九文化區，話要將香港打造成「亞洲文化之都」喎。照咁睇嚟，即使唔係爛尾收場，都唔會有咩好結果，到時候「亞洲文化之都」就冇嘞，「亞洲笑話之都」就有份！