二○一五年區議會選舉，本月二十二日就係投票日，全港十八區四百三十一個民選議席（包括十九個新增議席）將全面改選，是佔領運動後首次大規模選舉。
然而，本屆區議會選舉可說平淡如水，冇乜睇頭。老朽循例每日上東網，知道香港不少騎呢怪事，原來區選宣傳竟然走向低俗變態，有「性感女郎」旺角騎呢助選。
話說油尖旺區議會櫻桃選區，除了民主黨林浩揚及未有申報政治聯繫的鍾澤暉，還有外號「昭明公主」、已將身份證姓名改為「中出羊子」的男子，他夥拍三點式艷女宣傳，自己又手持「鳳凰龍獅旗」在旺角行人專區巡遊，出位譁眾到令人𢱑晒頭。「魔從心造，妖由人興」，勢估唔到咁快就在香港旺角街頭上演！
回歸後嘅香港，由「好客之都」變「驅蝗之城」，又由「示威之城」變「妖獸都市」，愈來愈烏煙瘴氣，即使有好打得、神一樣的高官，香港睇怕會繼續沉淪下去，好難會變成「天堂」處處。為選一席區議會，你可以去到幾妖？
中出羊子看來仍有好招數，你睇，佢喺社交網站聲稱，一旦成功當選，會爭取每個周末安排美女在旺角表演，抗衡經常在該處唱歌跳舞嘅「大媽」喎，而有網民竟留言會因此投票支持他！
老朽但知「矩不正，不可為方；規不正，不可為圓」，如果因為要睇「艷舞」而投中出羊子一票，香港真係「希望在明天」，因為若中出羊子當選，除了每周艷舞在旺角上演，令一眾大叔阿伯眼睛吃冰淇淋，更令人有時光回到昔日九龍城寨的「有飛揸飛，冇飛補飛」嘅人蛇艷舞時代，時光不但可以倒流，原來更可以回味！當然，以佢咁出位嘅諗頭，即使不幸落選，依然可以拍Ｍ巾廣告，送上他最輕柔的呵護！祝福你啊，中出羊子！