政情：今日你上鏡：嚴重光睇好港式奶茶登「台」
由中華廠商聯合會展覽服務公司主辦嘅葵涌美食嘉年華啱啱落幕，今屆入場人流比往年大增，唔止大批市民入場執平貨，台北經濟文化辦事處處長嚴重光及遠東貿易中心主任陳愛蘭等台灣駐港機構人員早前亦結伴入場參觀，沿途不停試食，好開心。
嚴重光一行人喺展覽服務公司主席戴澤良及太太羅台秦陪同下周圍逛，期間嚴重光見到大牌檔奶茶、川貝枇杷膏等地道香港味道食品，就念念不忘話佢哋應該到台北參加年貨展覽，相信會好受歡迎喎！佢咁上心，皆因明年一月下旬廠商會將率團參展，實行將工展會帶到台灣，梗要鼎力支持啦！