多個政黨近日排隊向特首梁振英（CY）表達對施政報告嘅意見，尋日輪到社民連梁國雄（長毛）見CY，但佢又點會肯坐定定飲茶傾偈吖，堅持要讀出同施政報告建議無關嘅公開信，最終CY拉大隊離場，認真鬧劇一場。
話說長毛昨午同獨立議員謝偉俊、醫學界梁家騮及勞工界潘兆平獲邀到特首辦與CY會面，但長毛表明要讀出公開信，要求CY交代收受澳洲公司UGL款項，及實施全民退休保障嘅時間表等。據聞CY即時回敬長毛：「你一讀，我就走，你唔走，我就請你走」，長毛當然唔聽話，CY隨即拉埋特首辦主任邱騰華等走人，長毛亦無癮離場，一拍兩散。特首辦其後回應話，長毛干擾會議進行，因此被請離席。
長毛事後告狀話要向立法會主席曾鈺成投訴，又話特首會見議員係憲制責任，過去亦曾當面向內地高官發表敏感議題，都未試過類似遭遇喎。至於同日另一時間有份會面嘅保險界陳健波就建議，豁免年薪七十萬元以下市民嘅薪俸稅，以減輕中產壓力，涉款約九十六億元，相信好多市民都望佢「成功爭取」。