政情：創科辦選址 水火不容「局」
創新及科技局（創科局）好不容易先通過撥款，經過一波三折，下周五終於成立。創科局辦公室當然安排設喺金鐘政府總部（政總），但政總入伙已久，靚位早已被其他政策局盤據，結果創科局要安排設於最高層廿六樓。頂層一向係最吃香嘅一層，居高臨下，有着大地在我腳下之勢，但政總最高層就相反，被視為「豬頭骨」，究竟點解呢？如今創科局硬啃豬頭骨，係咪暗示該局將會困難重重？
成立過程多災多難
豬頭骨者，無人要也，政府總部內有不少人認為，廿六樓呢個樓層，天生注定「風水」差，與創科局多災多難嘅成立過程，如出一轍。「風水」一說，並非要鼓吹迷信，而係有政府中人解釋，廿六樓位處最高，頂樓日曬夜曬，唔會係「高處不勝寒」，反而好可能會曬到「高處不勝熱」；加上當日不斷趕工催逼政總落成，導致啟用後幾年甩漏陸續浮現，例如落雨漏水，最受害都係頂層，形成「水火不容」格局。
據了解，廿六樓本身係用作臨時用途，現時努力裝修成為創科局辦公室，而同層亦有中央政策組，將來兩個部門會孖住幫政府隔熱同擋水。雖然呢層「水火不容」，但有講法係呢層高過政務司司長辦公室及財政司司長辦公室，變相踩住兩個司長。
新聞秘書乏人問津
硬件準備好，軟件又點呢？據聞創科局一眾同事已加緊籌備立局，人事方面，除咗政界盛傳特首創新及科技顧問楊偉雄擔任局長外，有傳副局長係警務處總電訊工程師黃振球，常任秘書長就係律政司政務專員卓永興，但邊個會做局長嘅新聞秘書？答案係幾乎無人肯做。
創科局係新成立，問責官員又係新人，做新聞秘書如當「保母」，事無大小做到足，遇着心靈弱小嘅局長，仲要兼任輔導工作；加上好多新聞官一直跟開某個政策範疇，轉變崗位自然要適應新事物，自然對調職耍手擰頭，結果要由政府新聞處總部調派首席新聞官去接火棒，先可解決事件。正所謂「好開始係成功嘅一半」，究竟創科局開局開成點，下周五之後自有分曉。