中環出更：鬧泛民助「創科」 黃之鋒鬼打鬼
學民思潮召集人黃之鋒，未夠秤就想參選立法會議員，似乎恨做議員恨到出晒面，仲借立法會財務委員會審議創新及科技局（創科局）嘅投票紀錄向泛民主派「挑機」，質疑好多泛民議員當日無投票，甚至「影都唔見」，暗示泛民「放水」助創科局通過，今次認真鬼打鬼喇！
開局申撥表決 13議員冇影
黃之鋒於社交網站facebook撰文話，根據投票紀錄，泛民三大黨包括民主黨、公民黨及工黨，喺上周五財委會會議只得一兩個議員投票，而泛民十三名本來會投反對或棄權票嘅議員，更加連影都唔見。佢話，不論贊成、反對或棄權，投票表態係代議士嘅責任，更質問到底有咩高深莫測嘅原因令十幾位泛民議員，同一時間「咁啱得咁蹺」缺席不投票喎。
其實泛民議員唔敢投票嘅原因，人盡皆知，現時風頭火勢，民意就係一切，故要出此下策，就算無做議員經驗嘅黃之鋒應該會明白，到底佢係真唔知定假唔知呢？佢咁樣攻擊泛民盟友，究竟係太傻太天真吖？抑或係另有目的？