中環出更：蒙眼夾餸 感覺「凌」敏
稻苗學會早前舉辦會慶晚宴，當晚會慶有別過往宴會，皆因主席邱金榮與一眾飲食界成員一開席，就齊齊戴上黑色眼罩，蒙住雙眼食飯，原來係要體驗視障人士進食時嘅感覺及困難。食物及衞生局常任秘書長謝凌潔貞（謝太）亦有出席，卓妮見佢拎住對筷子篤吓篤吓，之後沿住隻碟掃咗個圈，然後一擊即中夾中一件食物。
謝太話，原來佢認識一位義工曾經分享過視障人士進食嘅情況，會先用嗅覺感受一下有咩食物放於面前，然後至落手夾，好似當日佢就聞到餸菜一上枱時有陣西芹味，而根據佢經驗，西芹通常都係炒蝦，所以佢就用筷子篤咗幾下感覺吓係咪有類似嘅物體，之後再探索吓隻碟範圍有幾大，估計食物嘅位置。
邱金榮增設凸字餐牌
邱金榮就話，視障人士平日喺生活上仍有好多不便，例如點餐時睇唔到餐牌，所以佢近日就於旗下食肆增設幾份凸字餐牌，亦會提議學會內其他成員都考慮有關建議。
講起早前世界衞生組織宣布將加工肉類列入為最高風險致癌物，與香煙及酒精相若。太興集團老闆陳永安就話，消息一出，對佢哋生意明顯有影響，尤其係消息公布當日朝早，立即少咗人食餐蛋麵等常餐。不過，佢話好多嘢都係少食多滋味，好似燒烤咁，燒燶一樣會致癌，但大家間中都係會想食一次，唔過分就得。
香港餐務管理協會主席楊位醒認為，飲食要均衡，樣樣食物都唔可以食太多，鮑魚日日食一樣消化唔到，要視乎個人身體狀況而選擇食物。後生一輩如香港餐飲聯業協會副主席黃浩鈞及陳家強就一於少理，話喺外國讀書時日日都食加工肉類，現時已經習慣咗喇！