政情：郭琳廣法數雙精 成就「公職王」

讀大學揀咩科，真係可以改變一個人嘅命運。話說喺澳洲讀中學嘅監警會兼交諮會主席郭琳廣（Larry），原本諗住讀物理，仲要係研究大自然規則，點知聽完一位法官講嘅一席話，鼓勵佢利用合併法律學位課程優勢，同時修讀法律、會計及經濟，數口精嘅Larry最後就揀咗做律師呢條路，結果香港少咗個「神探伽利略」，但就多咗個同時擁有法律同會計學位嘅「公職王」。　Larry最近接受香港律師會訪問，話初入行時都吃過唔少苦頭，但憑着主動及不斷向前輩請教，都做到啲成績，又同合夥人成功創立自己嘅律師樓。身為監警會嘅主席，Larry話佢嘅法律訓練，有助清晰看待問題，分析案件亦較容易，而佢嘅會計背景，對佢管理律師樓及監警會都有幫助喎。