政情：民記傳單又錯 焗黨員入「社民聯」
政黨宣傳單張印錯嘢時有發生，但民建聯（民記）就錯得較為頻密，以致經常被網民改圖惡搞及嘲笑。該黨立法會議員鍾樹根派發嘅宣傳單張日前被網民發現將英文名「Chris」寫錯成「Chirs」後，該黨發現事件只是冰山一角，除了有多名區議會選舉候選人嘅傳單出錯外，最離譜係將新社聯與激進民主派社民連「合併」為「社民聯」。莫非製作公司想拉攏兩個政團合併，促進社會和諧？
原來字樣為「新社聯」
話說民記早前聘請多間製作公司為該黨百幾名區議會選舉候選人印刷宣傳單張，但發現當中唔少黨員嘅傳單都出錯。由於部分黨員同時身兼新界社團聯會成員，故此傳單當中會同時印有「民建聯」及「新社聯」嘅字樣，點知「新社聯」就寫錯咗做「社民聯」。好彩民記接收傳單樣辦後已經發現有錯，及時制止流出及向市民派發。
對於宣傳品連環出錯，民記就坦言的確係收到唔少黨員反映，而今次涉事嘅公司過往亦曾聘用，估計係因為要處理百幾人嘅宣傳品而有壓力，先至會出錯。不過，民記強調呢啲錯誤係不能接受，該黨會聽取黨友意見後再作檢討。樹根參選區議會選舉漁灣選區，同區候選人有報稱係小企業經營者嘅徐子見。