中環出更：慈善圖片展 供樓「智」難忘
胡百全律師事務所尋日起一連兩日於中環大會堂舉行七十周年圖片展，為兒童發展配對基金籌款。該律師行首席合夥人鄭慕智（Moses）出席活動開幕時話，由入行至今已做咗四十二年，憶起當年初入行，首月人工為六百七十元，一個月後加至一千元，要等到一九七七年先首次置業。佢話當年供樓都唔容易，每月供款三千六百元，笑言好在有太太一齊幫手供，負擔即時減半。
今次圖片展除了展出七十年前的舊照片外，Moses仲搵嚟一啲同事及朋友一齊拍攝作品用作籌款拍賣。Moses徒弟、該律師事務所合夥人黃嘉純都有現身，與師傅相聚即互戴高帽。Moses形容對方青出於藍，又做過律師會前會長，黃嘉純則指自己一九八五年由Moses正式簽佢做律師，仲好記得當晚大家食飯慶祝，食咗八千元，相等於佢當時一個月人工，可以話係「未見官先打三十大板」，但事後諗番，都覺得係超值嘅。
另展出珍貴舊用具
同場仲有律師事務所合夥人林月明，見佢同黃嘉純一同研究緊一張講「租者置其屋」計劃的相片，林月明話現時舊事重提，感覺時間過得好快，相片中的事仍歷歷在目。圖片展之中，卓妮就見到一幅胡百全「攻打四方城」嘅舊照片，打得好興奮；另外現場亦有展出辦公室的古董打字機及契約用具，非常珍貴。
對於港大校委會主席懸空，做過浸會大學校董會前主席嘅Moses就話，到目前為止都無人就有關事宜搵過佢，又話自己做咗十年浸大校董會主席，始終會有個心結，當年好多畢業生都係由佢「扑頭」頒發證書，若現時轉做另一間大學，心態上需要調整，因此有人搵佢都未必會應承喎。
卓妮