前立法會大樓矗立一尊正義女神像，手執天秤，雙眼蒙布，象徵公平公正，鐵面無私。可惜吖，呢啲只係假象，今日嘅立法會淪為包庇政客嘅保護傘，手執天秤象徵收取黑金，雙眼蒙布代表盲目護短，簡直係天大嘅諷刺。
係咁嘅，東方報業集團去年踢爆壹淫媒前主席黎智英兩年內向多個泛民政團及人士秘密捐款合共逾四千萬元，當中包括五名泛民立法會議員，但係五人從未依例申報，引起社會嘩然，唔止廉政公署立案調查，立法會亦展開調查。點知負責調查嘅立法會議員個人利益監察委員會黑白不分，早前放生毛孟靜、梁家傑同涂謹申，近日連李卓人同梁國雄都獲終止調查，即係話五名醜聞主角全部甩難，再次上演捉放曹鬧劇。
講真，議監會放生黑金議員，功夫茶一啲都唔覺得意外。係人都知，委員會委員中，反對派佔據半壁江山，佢哋向來沆瀣一氣，只問立場，不問是非，公然包庇五名自己友，有乜出奇吖？所以話，議監會嘅決定唔止冇洗清五名醜聞主角嘅罪名，反而凸顯政客蛇鼠一窩嘅醜陋。唔係咩？喺證據確鑿之下，李卓人同梁國雄都不得不承認將部分捐款「袋住先」，而「金主」黎智英作供時更加一味詐傻扮懵，問乜都話「唔清楚」、「唔知道」，擺明就係身有屎，咁都可以過骨，仲唔係護短！
政界人士就批評得啱嘞，立法會自己友查自己友，議監會所謂嘅調查根本毫無公信力可言。講到底，要震懾同懲治不良政客，始終要靠廉政公署亮劍。老實講吖，就算立法會懲處黑金議員，最多又係口頭譴責同炮轟，對厚顏無恥嘅政客嚟講，當痕嘅咋，廉署調查就唔同嘞，如果證實有罪，分分鐘監都有得坐，咁至叫彰顯法治吖嘛。話時話，廉署查黑金案都查咗超過一年，幾時至有結果吖？幾時至還社會一個公道吖？廉署查案無影無蹤，唔係想學班政客玩放生吖嘛？
話時話，反對派經常站喺道德高地，每當政府官員行差踏錯，佢哋就窮追猛打，咬住唔放，但係當自己人爆出醜聞，就苟且徇私，隻眼開隻眼閉，唔係雙重標準又係乜嘢吖？當然喇，立法會烏煙瘴氣，政客除咗捲入黑金醜聞，仲不務正業，唔係流會，就係拉布，單係去年二月至十二月咋，立法會響鐘多達四百幾次，累計虛耗七十小時會議時間，浪費千幾萬公帑之餘，仲嚴重拖慢經濟民生發展。政客唯恐天下不亂，何止應該減薪、扣薪，直頭要辭職謝罪喇。
立法會淪為垃圾會，搞到人神共憤，唔怪得正義女神像要蒙住雙眼喇，簡直冇眼睇吖！