政情：鄧國威童年 冇電視送飯
公務員事務局前局長鄧國威離任後尋日首次出席公開場合，於美荷樓與學生分享個人成長故事及經歷。講起童年時居住於灣仔板間房，因為冇電視，每晚飯後與家人傾偈就係佢嘅最大娛樂，因而與家人關係十分親密，唔會出現四個人都掛住望電視或玩手機嘅情況。
鄧國威憶述，佢讀書時性格比較內向，家中多客人時，佢都唔想行出房間應酬，但後來慢慢變得合群，又參加紅十字會等制服團體，仲笑言方便讀男校嘅佢可以順便識女仔添。
勉勵後生仔唔好怕蝕底
講到三十七年政府工作生涯，佢勉勵年輕人打第一份工唔好怕失敗同蝕底，亦唔好寄望第一份係好工，當係攞經驗，年輕時應該擺多啲時間在工作上。
至於退休後生活，鄧國威話現時好享受行山同食嘢，以及同年輕人分享經驗。被問到公務員係咪愈來愈難做，佢就話明白社會訴求愈來愈高，知道政府一直有為同事提供更多支持、人手及輔導工作。