中環出更：粵唱愈愛 善心滿載
粵劇文化源遠流長，近年更被列入為國家級非物質文化遺產之一，仁愛堂日前同錦尚暉劇團舉辦《煙雨重溫驛館情》慈善粵劇晚會。卓妮見到當晚活動副主任委員蔡少森，平日見佢說話咬字一向字正腔圓，原來係因為佢媽媽好鍾意唱粵劇，佢自小在旁聆聽，有時師傅教佢媽咪時仲會順便矯正埋佢嘅讀音，所以習慣咗說話要清晰喇。
講起說話懶音，蔡少森話就算讀書時老師都未必個個執得咁正，好似「滿載而歸」個「載」字係要讀「再」音，而當個「載」字同時間有關聯時，例如「千載難逢」，個「載」字先會讀成「宰」音，但佢就發現身邊好多人都讀得唔啱。佢又話，港人平日生活節奏急促壓力大，所以佢鍾意將說話速度減慢，可以邊講邊諗，當係抖吓氣喎。
陳華新擔大旗演出
仁愛堂主席史顏景蓮話，觀賞粵劇可以豐富長者生活興趣及擴闊社交圈子，讓長者有多個話題與身邊人傾談之餘，又可以增加佢哋團聚同結識新朋友嘅機會，當晚活動有超過五百位轄下中心長者獲贊助免費入場欣賞該劇目，籌得款項將用作加強長者愛心卡計劃。
總理陳華新（藝名陳培甡）則身體力行擔大旗演出劇中范蠡一角，佢話今次演出係佢師傅林錦堂其中一套戲寶，係佢師公粵劇紅伶林家聲親自教佢，林家聲八月與世長辭，林錦堂亦於兩年前逝世，因此今次慈善演出，陳華新特別努力，話希望當係獻畀師傅同師公嘅一番心意。
出席晚會仲有副主席賴楚惠、總理莫蔡倩文及李慧芬等。賴楚惠話，以前自己都對粵劇冇乜興趣，但自從參加慈善活動睇得多，發現粵劇旋律同內容都幾得意，就開始同朋友一齊去欣賞，依家已經成為消遣活動。
卓妮