有電視台做街訪，問題係如果中咗彩票，獎金會用嚟做乜。有人答︰「梗係買樓啦！」主持人追問︰「咁剩低嘅錢呢？」對方答︰「咪慢慢還囉！」
咪以為係笑話吖，現實就係咁。本港樓價同租金高處未算高，置業安居成為唔少市民遙不可及嘅夢想，搞到公屋輪候冊申請數字不斷創新高，平均輪候時間延長至三點六年，距離三年上樓嘅目標愈來愈遙遠。咁又難怪嘅，一個中產家庭想喺市區買個細小單位，閒閒哋要唔飲唔食唔消費十幾年，喺咁嘅環境下，公屋有乜法子唔爭崩頭吖。
最慘嘅係，公屋需求愈來愈大，但供應冇增加不特止，反而愈玩愈縮。房委會數字顯示，四年後落成嘅公營房屋只有約一萬五千個單位，當中出租公屋僅九千二百個，唔止創十幾年新低，亦遠低於長遠房屋策略嘅十年建屋目標，再咁落去，輪候公屋嘅人龍遲早排到去深圳都似。正如「東方報業民意調查」顯示，大部分受訪者認為港府無能力解決房屋問題，導致問題不斷惡化，三年上樓早就淪為空頭支票。
係人都知，細蚊仔唔可以輸喺起跑線，而今時今日嘅香港，申請公屋一樣唔可以輸喺起跑線。大家有眼見，具大專或以上學歷嘅非長者單身人士，申請公屋嘅比例逐年上升，家陣已經佔咗輪候冊一半咁滯，比四年前上升一成，其中四成申請者喺登記公屋輪候冊時仲係學生添。點解年輕人對公屋趨之若鶩？答案好簡單，年輕人收入一般較低，莫講話買唔起私樓，連租豆腐膶咁細劏房都租唔起，除咗申請公屋之外，仲有乜嘢選擇呢？
講到底，有頭髮冇人想做瘌痢。公屋本來係為基層市民提供嘅社會福利，家陣居然成為搶手貨，連大學生都爭埋一份，好彩上到樓嘅，直頭開心過中頭獎，都唔知究竟係可笑定可悲。
係人都知，要解決房屋問題，最重要係增加土地供應，港府話就話寸土必爭，可惜講就天下無敵，做就無能為力。正如上述調查顯示，大部分受訪者批評港府無充分利用空置土地，浪費資源。當然喇，社會阻力重重，加上有啲政客為反而反，港府就算想利用空置土地，都寸步難行喇。
最近有高官揚言，如果唔拓展鄉郊或填海，始終冇辦法一勞永逸解決房屋問題。鬼唔知阿媽係女人咩，問題係港府弱勢，乜都做唔到，連新界東北發展計劃都舉步維艱，拓展鄉郊或填海咯喎，根本就係吹水唔抹嘴。
講多無謂，食多會滯，旨意港府增加供應解決房屋問題，不如寄望自己中六合彩好過喇！