政情：唐慕貞講義氣 贏老師傅尊重
傢俬呢行向來予人印象男多女少，香港傢俬裝飾廠商總會常務副主席兼茲曼尼創辦人唐慕貞（Jane）就可以話係行內罕有女將，說話佢斯文細聲，聲線唔夠尖、樣子唔夠惡，到底係點樣管理一班以男士為大多數嘅下屬？講起最初入行時面對一班老師傅，佢就話有前輩教路「唔講粗口講義氣」，講得出做得到，以獲取身邊同事尊重。
初入行飽受「重男輕女」苦
Jane話，佢初入行時幫公司負責做外貿，好多時出去見客，其他公司高層都會當女士冇到，對佢視而不見之餘有時仲會安排佢坐隔籬枱，但佢一於厚住面皮堅持擔張櫈過去一齊坐。反而平日粗聲粗氣嘅師傅就對佢特別好，事關平日好多老師傅都驚「教識徒弟冇師傅」，但當年啲師傅對佢就冇乜保留，教識佢好多嘢。
講到近期零售業生意差，早前更加有連鎖傢俬集團全線結業，Jane就話佢哋受影響不大，事關佢哋係以本地客同訂造梳化為主，笑言好多港人鍾意返轉頭訂造同一型號梳化，所以需求相對穩定。