政情：蟹癡劉江華 有得講冇得食
每年秋天都係食大閘蟹嘅好時節，身為「蟹癡」嘅民政事務局局長劉江華，就話自己食蟹冇限制，唔怕會食得太多，似乎無懼膽固醇。本來諗住問吓佢今年食咗幾多大閘蟹，同埋啲蟹靚唔靚，點知佢今年仲未食過蟹喎！
一輪嘴推介至愛
劉江華話，因為工作太忙，每逢周六、日又經常要出席活動，所以仲未有時間去食大閘蟹，仲笑笑口話：「唔好以為做咗局長就有好多人請我食」。雖然佢今年未食過蟹，但都有好介紹，話食大閘蟹要記住「九月圓臍十月尖」，依家就最啱食公蟹喇，而佢亦最鍾意食公蟹。見佢講得咁開心，就知佢幾掛住大閘蟹，但蟹季日子所餘無幾，希望佢趕得切會一會最愛啦！
至於一向食素嘅副局長許曉暉，原來平日都有出席蟹宴，但佢話去蟹宴又唔一定要食蟹嘅，朋友會幫佢叫定啲素菜，如果食蟹粉紹菜煲，又會先幫佢淥熟啲紹菜，夾起畀佢先再落蟹，睇嚟啲朋友都幾細心喎！