政情：「結構」問題 郭振華退出區會
深水埗區議會主席郭振華決定放棄競逐連任，外界對佢棄選有不同揣測，尋日佢終於現身說法，承認因聲線及「身體Structure（結構）」出現問題，需要較長時間先可以復原。佢強調棄選係個人決定，無同其他黨派協調，亦唔係讓位畀任何人。
隨身帶柑橘水護聲
郭振華話，做區議會主席要成日講嘢，四年來把聲已經「拆」咗好多，仲因為咁唱唔到歌添，但笑言把聲變得磁性咗。雖然棄選意味來屆唔再做主席，但佢現時係回收基金諮詢委員會主席，同樣要花唔少唇舌。為咗保持聲線，佢話盡量避免長時間講嘢，同埋會帶備柑橘水傍身，咁樣會容易啲開聲。
他又透露，回收基金喺上月初供業界申請，直至本月底截止，今次係同生產力促進局做合作夥伴，每次開會都有近二百人參加，反映業界積極參與，希望未來可以提升回收物料嘅質量。
至於區議會主席一職將會由邊個接任，郭振華就表示唔想多講，但就話主席人選已經做咗區議員一段時間，並擔任多個委員會主席，有足夠經驗主持會議喎。