中環出更：陳健波尚方寶劍斬「拉布」
創新及科技局（創科局）撥款拖拖拉拉多年，終於決定喺星期五財務委員會會議中審議同表決。財委會主席陳健波尋日話，以後主持會議會用「欲速不達，先禮後兵，仁至義盡，水到渠成」十六字真言作為原則，先要求政府做好解釋工作，亦會畀議員有足夠時間發問，當議員「拉布」就用主席權力剪布。佢話自己唔係「有權用到盡」，亦期望議員「有乜可盡量鬧佢」，千祈唔好將憤怒發洩在秘書處身上。
陳健波一接任財委會主席，就遇到相當棘手嘅創科局撥款申請，上周五佢大刀一剪，將未有按要求整合嘅修訂動議由一千三百幾項，剪至剩低四十四項，搞到黃毓民大怒，掟爛名牌流血收場。陳健波尋日出席電視節目時表示，未來唔再需要同議員喺「拉布」問題上「講數」喇，以前就話法例唔清晰，所以要同「拉布」議員商討，但「今時唔同往日」，法庭已經裁定財委會主席有權力控制會議進程，佢就等於有咗「尚方寶劍」，唔怕泛民主派議員「拉布」，會議亦都會順暢好多喇！
做得好唔好 市民判斷
陳健波又話，佢裁決有個原則，就係「合情、合理、合法」若然議員問題重複、言之無物、內容只係責罵官員，佢就會覺得係時候「向前行一步」，而佢判決做得好唔好，市民會知道。陳健波上場之後，可以話係強政勵治，完全唔容許「拉布」議員放肆，希望真係如佢所言，用權力控制會議進程，唔好再被「拉布」議員攪亂議會喇！
卓妮