武俠小說話齋︰最安全嘅地方往往最危險。好多政府重地例如監獄咁吖，表面上守衞森嚴，實際上保安漏洞多多，隨時爆發恐襲危機，問你怕未！
唔係亂噏o架。潮流興航拍，好多人鍾意遙控無人機，以鳥瞰角度拍攝風景，加上航拍機喺香港無王管，基本上鍾意拍乜就拍乜，搞到七國咁亂。呢，試過有發燒友到大嶼山石壁水塘附近航拍，航拍機與石壁監獄最近嘅時候只有約一百米距離，全程二十分鐘冇受到任何干擾，懲教署職員直情當睇唔到。仲有吖，曾經有人到沙頭角航拍，靠近新圍軍營一樣來去自如，如果唔係遙控機失控墜毀，可能直接闖入軍營添吖。
咪以為呢啲係小事吖，萬一航拍機被不法分子甚至恐怖分子利用，咁就不堪設想喇。前排日本東京一架載有懷疑輻射液體嘅航拍機墜落首相官邸，事後附近一個公園驗出輻射超標二千倍；美國白宮較早前亦被航拍機「入侵」，當地甚至有人上載短片，將半自動步槍安裝喺無人機上，然後遙控開槍，都咪話唔得人驚。
所以話，航拍絕對唔止潮流玩意咁簡單，如果放任自流，分分鐘爆大鑊，唔怪得各地政府紛紛堵塞漏洞喇。美國聯邦調查局成立專責小組研究規管，並修改法例，規定航拍機用家喺網上註冊，以便出事時追究責任；日本亦將王宮、首相官邸、國會及核電站等重要設施列為無人機禁飛區。
港府又點應對呢？咪又係後知後覺，眾人皆醒官獨醉囉。本港並無任何法例規管航拍活動，非商業用而重量唔超過七千克嘅航拍機，僅被歸類為一般無線電控制模型飛機，而且完全冇禁飛區同飛行高度限制。有政黨調查發現，約七成受訪市民擔心航拍造成意外，更有超過八成人認為必須立法規管。咁又係吖，正如有學者話齋，雖然本港未發生涉及航拍機嘅嚴重事故，但外國案例已經敲響警號，當局有必要加強監管。
航拍機除咗有安全隱患，侵犯私隱亦係一大問題。美國加州政府最近立法禁止喺私人物業上空進行航拍，反觀香港喺呢方面仍然放任自流，淨係由私隱專員公署發出指引，呼籲市民留意保護私隱喎，講咗等於冇講。
始終都係嗰句，弗備難，難必至。唔該港產官僚打醒十二分精神，唔好又係等到死人冧樓至補鑊。係呢，港府咪成日話要借鑑外國先進經驗嘅，依家知點做嘞啩！