由多名民主黨（白鴿黨）前成員另起爐灶成立嘅政黨「新思維」，組成短短一個月，就已經接連獲多位政府高官接見。
「新思維」繼本月二十一日喺禮賓府與特首梁振英會面後，佢哋六名成員尋日亦獲政務司司長林鄭月娥、政制及內地事務局局長譚志源接見，稍後又會同民政事務局局長劉江華會面商討青年政策，而下月就會約見教育局局長吳克儉討論十五年免費教育。政府咁重視「新思維」，難免令人覺得政府對佢哋特別厚待，有意扶植佢哋發展喇。
「新思維」召集人狄志遠（阿Dick）就否認優待，仲話自己其實都食好多閉門羹，有啲人反應冷淡，惟有主動接觸多啲人，促成理性討論。佢又話，其他人點睇都好難去估計，除咗同政府溝通，仲有同商界、學術界、宗教界同政黨交流。
對於之前有成員講過希望政府委任公職，阿Dick話會面時無講呢個話題，又澄清當時唔係要求公職，而係想加入政府諮詢架構，貢獻社會喎。佢哋暫時對政府都係有讚無彈，「盟友」角色都幾明顯。
「新思維」尋日分別就三方面向政府提建議，分別係將十八個區議會重組成八個，以擴大區議會職能；將安老事務委員會升格至扶貧委員會級別，由司長級官員領導；設安老事務專員等。